Rita Ora

Na ishte njëherë, një vajzë e vogël e sapolindur me emrin Rita Ora, që lindi në Prishtinë. Ishte viti 1990, dhe gjëra të mëdha e prisnin përpara. Emri i saj i plotë ishte Rita Sahatçiu Ora. Mbiemri i saj, "Ora", do të thotë "kohë" në shqip, ndërsa "Sahatçiu" do të thotë "orëndreqës" në turqisht. Pra, mund të thuash se emri i saj kishte të bënte me kohën, dhe Rita donte të bënte çdo sekondë të jetës së saj të vlefshme!

Kur Rita ishte ende një foshnje, familja e saj u detyrua të largohej nga Kosova për shkak të luftës dhe u shpërngul në Londër, një qytet i madh plot me autobusë të kuq dhe njerëz nga e gjithë bota. Rita ishte shumë e vogël për ta mbajtur mend udhëtimin, por ajo udhë do të bëhej një pjesë e rëndësishme e asaj që do të bëhej më vonë.

Prindërit e Ritës ishin të fortë dhe plot dashuri. Nëna e saj kishte qenë mjeke në Kosovë, por në Londër iu desh të fillonte gjithçka nga e para. Madje, ndonjëherë i duhej të kërkonte ndihmën e motrës së madhe të Ritës për të përkthyer në zyrën e mjekut! Babai i Ritës hapi një pub në një lagje të quajtur Kilburn, dhe ndonjëherë Rita këndonte aty që kur ishte ende fëmijë.

Rita gjithmonë kishte një shkëndijë të veçantë. Ishte një vajzë e vogël me mendim të fortë dhe bënte gjithmonë pyetje. U bashkua me një kor dhe dashuronte të performonte. Talenti i saj e çoi në një shkollë të veçantë të quajtur Sylvia Young Theatre School, ku kishin studiuar edhe persona të famshëm si Amy Winehouse. Në moshën 13-vjeçare, Rita mori rolin e saj të parë në një serial televiziv dhe shumë shpejt më pas, luajti edhe në një film. Por ajo që donte më shumë ishte muzika.

Një ditë, kur Rita ishte 18 vjeç, dikush nga një shtëpi diskografike shumë e njohur e dëgjoi duke kënduar online. Ai ishte superylli Jay-Z dhe besoi në Ritën dhe në zërin e saj. Rita nënshkroi një kontratë me shtëpinë e tij muzikore dhe më në fund mund të shkruante dhe të këndonte këngët e saj. Ajo ishte në qiellin e shtatë!

Shumë shpejt pas kësaj, Rita pati suksesin e saj të parë me këngën Hot Right Now. Së shpejti ajo ishte kudo — hapte koncerte për grupin Coldplay, këndonte në festivale gjigande si Glastonbury, dhe madje performoi edhe në 100-vjetorin e Pavarësisë së Shqipërisë. Papritur, vajza që dikur këndonte në një pub po këndonte para mijëra njerëzve!

Gjatë viteve, Rita nuk u kufizua vetëm te kënga — ajo gjithashtu dizajnoi rroba, luajti në filma dhe ndihmoi kauza që i kishte për zemër. Bashkëpunoi me marka të mëdha mode si Adidas, duke dizajnuar veshje argëtuese dhe plot ngjyra. Njerëzit e adhuronin stilin e saj, ajo kurrë nuk kishte frikë të vishte diçka të çmendur apo ndryshe.

Por ajo kurrë nuk e harroi kush ishte dhe nga vinte. Nga një vajzë e vogël në Prishtinë në një yll ndërkombëtar, historia e Rita Orës na tregon se asnjë ëndërr nuk është shumë e madhe dhe asnjë zë nuk është shumë i vogël për t’u dëgjuar!

Nga Veronica Hibbert